Никольская сельская модельная библиотека

“Айар кутум кустуга” литературнай тэрээһин, муус устар 22 күнүгэр  Никольскай нэһилиэк модельнай библиотекатыгар буолан ааста.
Ол курдук  Нам улуһун  “Туллук Хаара” ырыа айаччыларын, “Отуу уота” суруйааччылар түмсүүлэрин кыттыылааҕа,  СӨ култуура уонна духуобунас министиэристибэтин “СӨ норуотун уус-уран айымньытын сайдыытыгар», «Нам улууһу муниципальнай тэриллии сайдыытыгар“, Никольскай нэһилиэк инники сайдыытыгар”, итиэннэ “Никольскай нэһилиэк уус-уран айымньытын сайдыытыгар” кылаатын иһин бэлиэлэр хаһаайката  Зинаида Нератова – Тупсууна бу тэрээһиммит сүрүн ыалдьытынан буолла. Бу тэрээһин, Зинаида Васильевна Никольскай оскуолатын алын кылаас оҕолоругар бэйэтин айар үлэлэрин, сөбүлүүр дьарыктарын туһунан билиһиннэрииттэн, саҕаланна.
Кинигэ быыстапкатыгар, айымньылаах үлэлэрэ, хоһооннорун хомуурунньуктара, араас күрэхтэргэ ылбыт, тиксибит ситиһиилэрэ турдулар.

Хоһоон уонна ырыа айааччы буолар талаанын арыйарыгар, сайдарыгар суол арыйбыт көҕүлээччилэрэ, уһуйааччылара, композитор Василий Алексеевич Зырянов, норуодунай бэйиэт Иван Васильевич Мигалкин, СӨ суруйааччыларын сойууһун чилиэнэ Юрий Васильевич Потапов – Саргын, Нам улууһун «Отуу уота» литературнай түмсүү салайааччы А.М.Татаринов, Нам улууһун «Туллук хаара» мелодистар түмсүүлэрэ салайааччы А.Т.Замятин, бу уһулуччулаах дьону кытта сибээстээхтик үлэлиирин, айар үлэтигэр уһуйуллан тахсыбытын туоһулуур матырыйаалларынан, оҥоһуктарынан сиэттэрэн, саас сааһынан кэпсээн оҕолор болҕомтолорун, интириэстэрин тарта. Дуоһуйа, астына иһиттилэр көрдүлэр.

Салҕыы Зинаида Васильевна хоһоону хайдах айыллан, туох санааттан суруйарын туһунан ыйытыкка эппиэт биэрэн санаатын үллэһиннэ, ол кэннэ оҕолорго хоһоону айарга холоноллоругар ыҥырда. Тутатына «кинигэ» диэн тылтан түөртүү строкалаах хоһооннору суруйан сөхтөрдүлэр да, үөртүлэр да…ол курдук чыпчаал кыайыылааҕынан, төрдүс кылаас үөрэнээччитэ, Аурика Баишева бэлиэтэнэн үөрэн-көтөн Зинаида Васильевнаттан дириҥ суолталаах бириис тутта.

Бу тэрээһиҥҥэ Тупсууна айымньылаахтык үлэлэһэр дьүөгэтэ, саха төрүт дорҕоонугар, инструменыгар, уһуйааччыта, А.Ф.Шестаков аатынан Улуустааҕы норуот айымньытын дьиэтин фольклорга исписэлииһэ, СӨ култууратын туйгуна, “Саха Өрөспүүбүлүкэтигэр Култуура эйгэтин бастыҥ үлэһитэ” бэлиэ хаһаайката, СӨ ырыа айааччыларын сойууһун, «Туллук хаара» мелодистар түмсүүлэрин биир айымньылаах үлэлэрдээх чилиэнэ, «Нам кылыһах» төрүт дорҕоон бөлөҕүн салайааччыта Мария Степановна Григорьева — Маайа кэлэн саха төрүт дорҕоонун, инструменнарын туһунан сиһилии билиһиннэрэн, кырыымпаҕа оонньоон иһитиннэрэн, кэлэн ыалдьыттаан, оҕолор сүргэлэрин көтөҕөн, оҕолору биир тэтимҥэ киллэрэн оонньотон, үөрэн-көтөн, күммүтүн киэргэтэн өссө төгүл доҕордоһуу күүһүн  бэлиэтээтибит.

Тэрээһиммит түмүгэр Зинаида Васильевна оҕолорго анаан бэйэтин кинигэтин уонна тэрээһин иннинэ өйдөбүнньүк уопсай түспүт хаартыскабытын тута бэчээттэтэн бэлэх тутан, оҕолорбут билиилэрин хаҥатан, үөрүү-көтүү аргыстаах, астынан дуоһуйан тарҕастылар.
Айар аартыкпыт кустугун араас дьүрүскэнэ, уһун, киэҥ суолунан айанната туруохтун. Айар дьоҕурбут арылла туруохтун, кэнчээри ыччаппыт кэскиллээх буолуохтун!