Никольская сельская модельная библиотека

Иванова, Галина Никитична – Айтыына.  Күнүү содула : кэпсээннэр / Галина Иванова-Айтыына. – Дьокуускай : Айар, 2024. – 144 с.

Кинигэҕэ киһи сирдээҕи олоххо аналын, Дьылҕа хаан тургутуутун – киһи соһуччу көрсөр кыһалҕаларын, очурга оҕустарыытын, тапталга бэриниитин уонна таҥнарыытын туһунан кэпсээннэр киирдилэр. «Күнүү содула» хомуурунньукка 17 кэпсээн киирдэ. Сюжет хамсааһына тэтимнээх. Ааҕааччы сэҥээриитин ылыа.

Нельбисова,Галина Васильевна. Чып кистэлэҥинэн… сэһэн / Галина Нельбисова. – Дьокуускай : Айар, 2024. – 288 с.

Төрүүр дьиэҕэ биир күн бэбээрэ түспүт уоллаах кыыстарын ийэлэрэ сылаас түөстэригэр ыга кууспуттара, биһиктэригэр нөрүйэн, оҕолорун инники дьылҕатын түстүүр, алгыыр тыллары аргыый сипсийбиттэрэ… Бу уоллаах кыыс сэрэйбэтэх сэрэбиэйдэрэ, түһээбэтэх төлкөлөрө хайдах салаллыаҕай? Чып кистэлэҥ арыллыа дуо… Ол барыта дьиэ кэргэҥҥэ сыһыан, сиэр-майгы, таптал, уйулҕа нарын кылларын таарыйан көрдөрүллэр.

Марков, Степан Степанович. Дьылҕа, тыйыскын даҕаны… / Степан Марков а.  – Дьокуускай : Айар, 2024. – 128 с.

Степан Марков «Чокуур» уонна «Дьылҕа, тыйыскын даҕаны» сэһэннэригэр сүрүн дьоруойдар олохторугар мээнэ киһи тулуйбат ыарахаттарын көрсөллөр. Чокуур туора киһи дьалаҕайыттан өлөр өлүү айаҕыттан кыл түгэнэ быыһанар, ол эрээри чэгиэн бэйэтэ соҕотохто киһи аҥаара буолан хаалар.
Оттон «Дьылҕа, эн тыйыскын даҕаны» сэһэн дьоруойа Аҕа дойдуну көмүскүүр Улуу сэрии кэмигэр күрүөйэхтэр кэккэлигэр киирэн, төрөппүттэрин саакка-суукка, эрэйгэ тэбэр. Ааптар төрөппүттэр барахсаттар хайдах курдук санаа ытылҕаныгар сылдьалларын, уйулҕаларын аһаҕастык ойуулаабыта ааҕааччыны долгутар.

Марков, Степан Степанович. Таптыырга саас мэһэйдээбэт : кэпсээннэр / Степан Марков ; хомуйан оҥордо С. С. Барышева-Маркова.  – Дьокуускай : Айар, 2023. – 152 с.

Степан Марков «Таптыырга саас мэһэйдээбэт» кэпсээннэрин хомуурунньуга.  Ааптар саҥа хомуурунньугар дьиҥ олохтон араас дьон дьылҕатын түмэн олус кэрэхсэбиллээх кэпсээннэри киллэрбит.
Дьылҕа Хаан үөйбэтэх-күүппэтэх өттүттэн киһи олоҕун ытыйара баар суол – огдообо эр киһи оҕотун уонна таптыыр дьахтарын икки ардыларыгар хайа тартарыыта, кырдьаҕас дьон соһуччу күөдьүйбүт таптал иэйиитигэр куустарыылара, кырыыс тыл оҕо дьылҕатыгар дьайыыта, тапталы таҥнарыыттан олох сатарыйыыта…

Андросов, Иван Афанасьевич – Айанньыт. Тумаҥҥа симэлийбиттэр : роман. Ч. 5. Уһуйуллуу. Дагдаҕар Боотур / И. Андросов – Айанньыт. – Дьокуускай : Айар, 2024. – 224 с.

Ааҕааччы киэҥ сэҥээриитин, биһирэбилин ылбыт Иван Андросов-Айанньыт «Тумаҥҥа симэлийбиттэр» диэн историческай айымньытын «Уһуйуллуу. Дагдаҕар Боотур» бэһис кинигэтигэр боотур буоларга айылҕаттан анатыылаах уол оҕо уйана-хатана биллэр кыргыс үөрэҕэр такайыллан, Дьылҕа Хаан уустук тургутууларын, оһолун-буомун сылбырҕа-сымса туттунуутунан, сатабылынан, хорсун санаатынан, ураты чуор дьоҕурунан, итиэннэ Аар айылҕа араҥаччылыыр күүһүнэн эрдээхтик туораан, Дагдаҕар Боотур дэтэн, улахан аҕа ууһун боотурдарын бас-көс киһитэ буолара ураннык хоһуйуллар.

Попов, Иван Михайлович – Уһук Уйбаан. Таптал сүдү күүһэ : [дьоҕус сэһэннэр] / Уһук Уйбаан. – Дьокуускй : Айар, 2024. – 128 с. – (Таптал таабырына).

Уһук Уйбаан «Таптал сүдү күүһэ» диэн киһи аймах өрө тутар, сүгүрүйэр, олох укулаата буолар сүрүн иэйиитэ — таптал туһунан дьоҕус сэһэннэрэ хомуурунньук буолан күн сирин көрдүлэр.
Суруйааччы дьиҥнээх ыраас таптал, хаһан да умнуллубакка, киһи олоҕун устата сүрэххэ кичэллик кистэнэ сылдьарын туһунан итэҕэтиилээхтик сэһэргиир.