Никольская сельская модельная библиотека

Федор Яковлевич уонна Анна Сидоровна Полищенколар Красноярскай кыраайтан кэлэн Нам улууһун Никольскай сэлиэнньэтигэр олохсуйбуттар. Федор Яковлевич үөрэхтээх, дьаһаллаах киһини дэриэбинэҕэ старостанан талбыттар. Ол саҕана кини отчуотунан дэриэбинэҕэ 95 киһи олорбут (58 эр киһи, 37 дьахтар) 14 нуучча дьиэтэ, 19 ат, 27 ынах баара. Федор Полищенко дэриэбинэ ортотугар улахан, бөҕө-таҕа, элбэх хостоох дьиэ туттубута. Дьиэ улахан залалаах, 2 оһохтоох, улахан таас түннүктэрэ аһыллар арамалаахтар, оһуордаах наличниктардаах, үрдүк соппулуот олбуордаах, икки ампаардаах, хааман киирэр булуустаах, элбэх хаһаайыстыбаннай тэрили уурар уонна көлүллэр аттар туралларыгар сарайдардаах, олбуор таһыгар сүөһү турар хотонноох, конюшнялаах эбиттэр.

Полищенколар 9 оҕолоохторуттан 6-та уол, 3-һэ кыыс этилэрэ. Аҕа дойдуну көмүскүүр Улуу сэриигэ биэс уолаттарын сэриигэ атаарбыттара. Анна Сидоровна Полищенко эрдэ огдообо буолбута Улахан уолаттар Федя уонна Афоня ыал буобуттара. Анна Сидоровна эбээ буолан ньир-бааччы олордохторуна сэрии буолбута. Филипп, Алексей уонна Афанасий бастакы ынырыыга барбыттара. Оттон иккис ынырыыга кинилэр бырааттара Федор уонна Илья барар буолбуттара. Анна Сидоровна түөрт уолун сэриигэ атаарбыта. Кини кыыһынаан Иралыын хааланнар кыайыы туһугар, өстөөҕү үлтүрутэри түргэтэр туһутар тыыл хоһуун дьонун кытта тэҥҥэ үлэлэспиттэрэ. 1943 сыллаахха Афанасий Полищенко Соловьевск дэриэбинэ иһин кыргыһыыга өлбүтүн туһунан биллэрии кэлбитэ. Оттон Федор 1944 сыллаахха кыргыс толоонугар эмиэ геройдуу охтубута. Ити кэнниттон Анна Сидоровна аччыгый уолаттарыттан Филиптан уонна Ильяттан суруктары тутан санаатын аралдьытара. Кини ити икки уола сэриини түмүктээн баран дойдуларытар эргиллэн кэлбиттэрэ.

Полищенко Федор Федорович

Федор 1911 сыллаахха төрөөбүтэ. Каландарашвили колхоз туруу үлэһитэ, баянист-гармонист буолан нэһилиэк олоҕор барытыгар көхтөөктүк кыттара, 1942 сыллаахха бэс ыйын 26 күнүгэр иккис улахан хомуурга Нам РВК ыҥырыллан сэриигэ барбыта.. 4-й Гвардейскай мотострелковай мех.крп рядовойа. 1943 сыл от ыйын 28 күнүгэр хорсуннук сэриилэһэ сылдьан Ворошиловскай уобалас Сталинградскай оройуон Степановка дэриэбинэтин иһин охсуһууга охтубутун уонна көмүллүбүтүн туһунан хара сурук кэлбитэ.

Көмүллүбүт сирэ: Украина, Сталинскай уобалас,  Снежнянскай р-н,  х. Степановка

Полищенко Афанасий Федорович

1913 сыллаахха төрөөбүтэ. 1941 сыллаахха алтынньыга бастакы хомуурга армияҕа ыҥырыллыбыт, 1944 сыл алтынньы ыйыгар диэри сэриилэспитин уонна Соловьевск диэн дэриэбинэни босхолооһунна сураҕа суох сүппүтүн туһунан биллэрии кэлбит. Арай 01164 нүөмэрдээх полевой почтата ыйыллыбыт.

Полищенко Филипп Федорович

1915 сыллаахха Никольскайга төрөөбүт. 1941 сыл от ыйыгар убайа Афанасийы кытта биир хомуурга түбэһэн сэриигэ ыҥырыллыбыт. Филипп Федорович Полищенко Днепри мүччүргэннээх туорааһынҥа кыттыыны ылбыт. Кини Венгрияны, Румынияны, Болгарияны, Чехословакияны босхолуур кыргыһыыларга кыттыбыт. Верховнай Кылаабынай Командующай махтал суругун: икки төгүл ылбыт. Немецкэй-фашистскай халабырдьыттары кыайыы күнүн — ыам ыйын 9 күнүн Прагаҕа көрсүбүт. Саллаат Филипп Полищенко ити кэнниттэн атын буойуннары кытта илин диэки айаннаабыт. Японскай милиатаризмы утары, Квантунскай армияны урусхаллыыр кыргыһыыларга кыттыбыта Кини Японияны кыайыы үөрүүтүн Порт-Артурга көрсүбүтэ. Аҕа дойдуну көмүскүүргэ икки кыайыыны түмүктэспит, хорсун саллаат түөһүгэр иилиммит элбэх бойобуой медаллара туоһулуур, дойдутугар 1945 сыл атырдьах ыйыгар кэлбитэ.

Наҕараадалара: Аҕа дойду сэриитин II степеннех орденын, «Бойобуй үтүөлэрин иһин», «Германияны Кыайыы иһин», «За освобождение Праги», «Японияны кыайыы иһин» медалларынан, 2 төгүл Главнокомандующай И. В. Сталин махтал суругунан наҕараадаламмыта.

Полищенко Алексей Федорович 

1917 сыллаах төрүөх. Аҕа дойдуну көмүскүүр сэриитигэр Нам РВКнан бастакы хомуурга 1941 сыллаахха ыҥырыллан барбыта. Алексей сэрии толоонуттан теннүбэтэҕэ, уҥуоҕа ханна хараллан сытара көстө илик.

Полищенко Илья Федорович 

1919 с. төрөөбүт Никольскай сэлиэнньэтигэр төрөөбүтэ.  Сельскохозяйственный техникумна суопппарынан үлэлээбитэ. Шофер СХТ. 1946 с. демобилизацилянар. 1966 с. өлбүт.

Наҕараадалара:  медаль «За победу над Германией».