Никольская сельская модельная библиотека

Николай Денисович 1895с. ахсынньы 15 күнүгэр 4-с Байаҕантай нэһилиэгэр сэниэ ыалга төрөөбүтэ.

Ыал соҕотох уола уонна бастакы оҕо буолан дьоно олус маанылаан уонна таптаан ииппиттэрэ. Аҕата — Неустроев Денис Петрович Таатта улууһун сис баайдарын Оруоhуттар удьуордара, Өксөкүлээх Өлөксөй, чугас доҕордоро этэ.

Ийэтин Слепцова Ксения Петровна дойдутугар Баайаҕа 4 группалаах оскуолатын 1904-1909 сс. үөрэнэн бүтэрэн баран, Николай 1910-13сс. Дьокуускайдааҕы 4 кылаастаах училищеҕа үөрэммитэ.

1912с. үөрэнээччи ыччакка ананан нэдиэлэҕэ биирдэ тахсар илиинэн суруллар «Юность» сурунаалга редактордаабыта.

Николай Неустроев улуу нуучча норуотун, кини культуратын уонна кини улуу представителлэрин олус таптыыр этэ. Ол иһин кини, олус үлүhүйэн туран, нуучча тылын уонна литературатын кичэйэн үөрэтэрэ. Аҕатыттан уhуйуллан, Николай Денисович бултуур, балыктыыр идэлээҕэ.

1916с. Н.Д. Неустроев Дьокуускайга орто үөрэх оскуолаларыгар үөрэнэр ыччаттар бөлөхтөрүн комитетын чилиэнинэн талыллыбыта.

Бу сылга Платон Ойунскайдыын Гоголь «Ревизор» диэн комедиятын тылбаастаабыттара, бу саҥа саҕалааччы драматург бастакы холонуута буолбута.

1919 сыллаахха улуус ревкомугар, 1922 сылтан 1924 сылга диэри Уолба оскуолатыгар учууталлаабыта.

Николай Денисович сахалартан бастакынан драматургия жанрынан комедияны суруйууга үлэлээбитэ, пьесалара саха театральнай искусствотын сайдыытыгар уhулуччулаах оруолу ылбыттара.

Кини бастакы оҕо суруйааччытын быhыытынан эмиэ киэҥник биллэр. Ол курдук, «Балыксыт», «Сэмэнчик», «Муммут оҕо кэпсээнэ» уо.д.а. кэпсээннэрэ саха литературатын бастыҥ айымньыларын быhыытынан сыаналаналлар.