Никольская сельская модельная библиотека

Саха Республикатын Культуратын туйгуна, Саха Республикатын Ырыа айааччыларын сойууhун чилиэнэ, сахалартан бастакы мелодист дьахталлартан биирдэстэрэ, биир дойдулаахпыт Светлана Кудрина Светлана Николаевна 1949 сыллаахха олунньу ый 18 күнүгэр Нам оройуонугар Никольскай нэһилиэгэр Герой ийэлээх дьиэ кэргэннэ иккис оҕонон күн сирин көрбүтэ. Орто оскуоланы бүтэрэн ырыа абылаҥар ылларбыт талааннаах кыыс Дьокуускайдааҕы культурнай — сырдатар училищены, Москваҕа эстрада артыыстарын бэлэмниир мастерскойу бүтэрбитэ. Онтон эстрада артыыһынан хас да сыл үлэлээбитэ. Светлана элбэх оҕолоох дьиэ кэргэҥҥэ улахан кыыс буолан дьонугар көмөлөһөр сыаллаах төрөөбүт дойдутугар тахсан совхоз производствотыгар үлэлээбитэ. Светлана Кудрина, 1978 сыллаахха республикаҕа аан бастакынан самодеятельнай композитор, культура туйгуна И.А. Бубякин  тэрийбит Нам оройуонун эдэр талааннара «Туллук хаара» мелодистар оройуоннааҕы түмсүүлэрин, республикатааҕы мелодистар ассоциацияларын чилиэнэ.  1997с. республика уус-уран самодеятельноһын көрүү дипломана. Бастакы ырыатын «Сааскы   ырыа»   диэни 1967 сыллаахха айбыта. Билигин дьон уоһуттан түспэт ырыалара: «Күнү таптыыбын» (И.Гоголев), «Табалар», «Мин бүгүн сыһыыга сырыттым» (М.Тимофеев), «Суолга», «Ypүҥ түүн», «Истиий дуу, доҕоруом», «Айдаан», «Ыллыах Ылдьаа», «Таптал тангота» уо.д.а.. 2004 сыллаахха «Чараҥым суугунуур ырыата» диэн айар үлэтин  хомуурунньугун таһааттарбыта. Манна Светлана Николаевна ырыатын сөбүлээн истээччилэригэр анаан субу курдук суруйбута — «Бу, мин уһун сыллаах олоҕум кэрчиктэрин, уран тылбын чочуйан, мелодиялаан халыыпка киллэрбит кэпсээним. Дууһам көтүүтүн, санаам түһүүтүн, барытын ырыанан эппитим буолар.»