Никольская сельская модельная библиотека

Колесова Екатерина Романовна 1954 сыллаахха төрөөбүтэ, Никольскай сэлиэнньэ төрүт олохтооҕо. 1993 сылтан Нам улууһун ЦБС филиалын сэбиэдиссэйинэн үтүө суобастаахтык үлэлээбитэ. Екатерина Романовна үлэҕэ киириэҕиттэн бэйэтин грамотнай специалист быһыытынан биллибитэ, үлэтигэр айымньылаахтык, үтүө суобастаахтык сыһыаннаһара. Бу көҕүлүүр уонна айар үлэһит, кини билиитэ-көрүүтэ, уопута үлэҕэ үрдүк көрдөрүүлэри ситиһэргэ кыах биэрэр. Маассабай тэрээһиннэри ураты уонна интэриэһинэй ыытара. Кини оҥорбут сценарий матырыйааллара олохтоох нэһилиэнньэ ортотугар да, оройуон таһымыгар да үрдүк сыанабылы ылаллар. Екатерина Романовна улууска сыл аайы ыытыллар норуот айымньытын фестивалларыгар тыа сирин театрализованнай көрдөрүүлэрин сценариһа уонна туруорааччыта. Бибилэтиэкэҕэ номнуо хас да сыл устата «Дайыыс» драмкружок үлэлиир, онно оскуола саастаах оҕолор да, улахан дьон да дьарыктаналлар. Ону тэҥэ кини оскуолаҕа «Мутукча» литературнай куруһуогу ыытара, онно үөрэнээччилэр бэйэлэрин айар үлэлэрин сайыннараллара, бастакы хоһооннорун, кэпсээннэрин суруйа сатыыллара, бу үлэ кинилэр ааҕыыга интэриэстэрин үрдэтиигэ туһуланар. Екатерина Романовна «Саха Сирин Кыраайы үөрэтээччилэрэ»республикатааҕы общественнай тэрилтэ чилиэнэ.  Уһун, сыралаах үлэ түмүгүнэн «Никольскайдар сэрии сылларгар»диэн кинигэни таһаарыы буолбута. Бу дойдуну өстөөҕү кытта кыргыһыыга көмүскээбит, Аҕа дойду тутулуга суох буолуутун көмүскээбит, бу сэриигэ кыайбыт боростуой дьон хорсун быһыыларын, геройдарын үйэтитиигэ сыаната суох кылаат буолбута. Бу кинигэ ыччакка Төрөөбүт дойду историятын ордук өйдүүргэ көмөлөһөр уонна дьиҥнээх патриоттары иитэр. Екатерина Романовна тулуурдаах, дьулуурдаах буолан үүнэр көлүөнэ бэйэтин ма историятыгар сыаната суох бэлэх ылла.

Екатерина Романовна нэһилиэк общественнай олоҕор көхтөөхтүк кыттар. Кини «Энсиэли»улуус хаһыатыгар бэчээт бастайааннай ааптара. Сельсовет депутатынан, нэһилиэккэ «Билии» уопсастыба бэрэссэдээтэлинэн, дьахтар сэбиэтин чилиэнинэн, «Эрэл»туелбэ начальнигынан үлэлээбитэ. Кини нэһилиэккэ ыытыллар бары тэрээһиннэргэ актыыбынай кыттыыны ылар. Билигин нэһилиэк кырдьаҕастарын сэбиэтин салайар.

Культура управлениетын дипломунан, улуус фестивалларыгар театрализованнай көрдөрүүлэри сценарист уонна туруорааччы быһыытынан наҕараадаламмыта. Култуура үлэһиттэрин профсоюһун Нам территориальнай тэрилтэтин Бочуотунай грамоталарынан, «Нам улууһа» МТ култуура уонна духуобунай сайдыы управлениетын Бочуотунай грамоталарынан уонна «Нам улууһа»МТ Баһылыгын махтал суругунан наҕараадаламмыта. 2014 сыллаахха «Саха Өрөспүүбүлүкэтин култууратын Туйгуна» бэлиэнэн наҕараадаламмыта. 2015 сыллаахха «Умсугуйуу» номинацияҕа тыа дьонун ааҕыыны өйүүр бастыҥ үлэҕэ тыа библиотекаларын республикатааҕы куонкуруһун кыайыылааҕа буолбута. 2015 СӨ култууратын уонна духуобунай сайдыытын Министиэристибэтин бочуотунай грамотатынан наҕараадаламмыт. 2016 сыллаахха «Библиопрофи-2016″улуус куонкуруһун дипломана буолбута. 2017 сыллаахха Никольскай тыа бибилэтиэкэтэ «модельнай бибилэтиэкэ»статуһу ылбыта. 2017 с.Никольскай нэһилиэк «Ытык киьи» бэлиэтэ иҥэриллибит.

Екатерина Романовна биэс оҕо кыһамньылаах ийэтэ уонна тапталлаах эбэтэ. Оҕолор бары үрдүк үөрэхтээхтэр уонна араас эйгэлэргэ идэлэринэн ситиһиилээхтик үлэлииллэр.