Алтынньы ый 11 күнүгэр Никольскай нэһилиэгин аҕам саастаахтарыгар аналлаах «Дьоһун саас» диэн сэргэх бырааһынньык буолан ааста.

16.10.2024
1540
нет

Новости

Манна үөрүүлээх быһыыга-майгыга Дьиэ – кэргэн сылыгар аналлаах знагы нэһилиэк общественнай, культурнай олоҕор активнай кыттааччыларыгар — саха үгэһин илдьэ сылдьааччы, уһуйааччы Валентина Васильевна Осипова уонна саха төрүт ииһигэр уһуйааччы Анна Еремеевна Олесова дьиэ кэргэттэригэр нэһилиэк баһылыгын солбуйааччы Марфа Егоровна Кривошапкина туттарда.

Сүрүннүүр специалист Сардаана Станиславовна Винокурова нэһилиэк салалтатын аатыттан эҕэрдэлээн туран ветераннар сэбиэттэрин салайааччытыгар Екатерина Романовна Колесоваҕа сибэкки дьөрбөтүн уонна торт бэлэх туттарда.

Нэһилиэк депутаттарын аатыттан Григорий Семёнович Потапов эҕэрдэлээтэ.

Ол кэннэ эҕэрдэ тылы нэһилиэк ветераннарын салайааччыта Екатерина Романовна сэрии кэмин оҕолоругар эҕэрдэ сурук, сэмэй бэлэх туттарда, сэбиэт чилиэнэ Валентина Васильевна истин эҕэрдэ тыллары этэн туран эҕэрдэтин ырыанан түмүктээтэ. Дьоро киэһэни «Намыына» ырыа ансаамбыла, салайааччы София Охлопкова, РФ үөрэҕириитин туйгуна, Нам улууһун «Ытык киһитэ», Нам улууһа «Туллук Хаара» мелодистар, «Отуу уота» хоһоонньуттар түмсүүлэрин чилиэнэ, СР мелодистарын түмсүүтүн чилиэнэ Мария Харитонова-Елисеева, Марфа Федотова, баянист Илья Новиков киэргэттилэр.

Е. И. Бубякина аатынан норуот айымньытын дьиэтэ тэрийиитинэн урукку өбүгэттэн хаалбыт мал-сал, коллекция «Ретро-выставка» күрэҕэ буолла. «Путешествие в мир кино» интеллектуальнай оонньууну нэһилиэк модельнай библиотеката ыытта, дьон сүрдээх интириэстээхтик кытынна. Тэттик, көхтөөх оонньуулары ыытан дьону сэргэхситтэ нэһилиэк спортинструктора Күннэй Дмитриевна Абрамова. Бу киэһэ аҕам саастаах дьон декадатын чэрчитинэн нэһилиэкпит араас талааннаах, дьарыктаах дьонун туһунан уһуллубут «Илиибит сылааһын иҥэрэн» видеосюжеты олус сэргээн көрдүлэр. Видеосюжеты устан, таҥан оҥордулар Е. И. Бубякина аатынан норуот айымньытын дьиэтин уонна нэһилиэк модельнай библиотекатын үлэһиттэрэ.

Күндү Аҕам саастаах ытык — мааны дьоммутугар барыгытыгар чэгиэн- чэбдик доруобуйаны, өссө да өр сылларга биһигини үөрдэ-көтүтэ, сүбэ-ама буола, этэҥҥэ сылдьаргытыгар баҕарабыт!

Кырдьыы кыттыспатын, ыарыы ыалласпатын, чугас дьоҥҥут тапталларыгар бигэнэн уһун үйэлэниҥ.